غزل

شور ومه غوغا ومه او ځار دې له بېلتون شمه
تاته مخامخ شمه نو پټه خوله پښتون شمه

دغه زما ژوند دی په شېبه کې درته راشمه
بېرته په شېبه کې ښکلیه یاره درنه ستون شمه

ځار دې شم کوربان دې شم د مینې حدود مه ساته
پرېږده چې دا ستا په محبت کې زه مجنون شمه

زه یو کلیوال د محبت په اور مې زړه پوخ دی
مه مې چېړه نه چې درته اور د شواخون شمه

ماته خدای په شعر کې اعجاز د مسیحا راکړ
چېرته چې مرګونه وي نو زه ورته ژوندون شمه
۲۰۰۶ اپریل