غزل

ورک شمه په خاورو کې په زر کې را پیدا شمه
زه نو پس له مرګه لر او بر کې را پیدا شمه

تاته مخامخ شمه غایب له دې دنیا شمه
بېرته دې د سترګو په نظر کې را پیدا شمه

شور یم شور د مینې محبت که مې څوک حس کړي نو
ګوره مې د ښکلي زړه په سر کې را پیدا شمه

زه په پښتو ژبه دومره خوږ شم لکه خوږ جانان
کله چې غزل شم او هنر کې را پیدا شمه

ستا د سپینو لېچو د بنګړیو شرنګهار ته جان
پټ د ولو شاته په ګودر کې را پیدا شمه

کار لرم روزګار لرم او ټوله ورځ په کور نه یم
راشه که مې ګورې مازدیګر کې را پیدا شمه

جار شمه کماله د یادونو خوی مې واخیستو
داسې چې په زړه د خوږ دلبر کې را پیدا شمه

جون ۲۱ – ۲۰۰۶