زه حیران په لویه لار کې
زه خوب وینم
نه نه زه ویښ یم او خوب وینم
مګر دا کله امکان لري چې څوک دې په ویښه خوب وګوري؟
اوف
دلته څه شی امکان نلري؟
دلته د خوب او ویښې تر منځ توپیر پای ته رسېدلی
هغه څه چې زه یې په رڼو سترګو ګورم د خوب ګومان پرې کوم
او هغه څه چې نه یې شم لیدای هغه ته حقیقت وایم
زه د نړۍ تر ټولو ستر ړوند یم
نه نه زه ړوند نه یم
زه د نړۍ تر ټولو شل انسان یم
اوه نه زه په لاره تلای شم زه شل هم نه یم
زه د نړۍ تر ټولو ستر کوڼ یم
اه نه، زه کوڼ هم نه یم، ځکه د هر چا خبرې اورم
زه د نړۍ تر ټولو بې احساسه انسان یم
هو –
دا خبره سمه ده
ځکه زه هر څه وینم
هر څه اورم
او هر چېرته تللی شم
مګر
زه هغه احساس نلرم چې دغه حرکتونه پرې وکړم
اه
خبره څه ده
زه ولې دومره بې وسه او ناتوانه یم چې خپله خبره ملموسه ساتم
ولې دومره کمزوری یم چې د خپلې خبرې د کولو واک هم نلرم؟
اه
یوې خوا ته پړانګ
بلې خواته ډانګ
که زه وایم چې د ښوونځي سوځول او د ښوونکي وژل ناروا کار دی
نو د کفر او الحاد فتوا راباندې صادرېږي
او که زه دا هر څه پخپلو سترګو وینم او پټه خوله پاتې کېږم
نو دا خو یقیناً ستره ګناه ده
کفر دی الحاد دی
ځکه زموږ اسلام
د پوهې او علم زانګو ده
نه د جهالت او ناپوهۍ توره کنده
نو اې د ظالمې اروا څښتنه!
ته څوک یې چې زما په مقدساتو لوبې کوې
څوک یې چې زه دې په لویه لار کې حیران دریان درولی یم
او د کفر او اسلام حال مې اخلې
څوک یې چې زه دې په ویښه د خوبونو د دنیا اسیر ګرځولی یم
اهای
خبره مې اورې
که ته زما خبرې نه اورې نو د سپېڅلي پیغمبر یوه خبره عملي کړه چې فرمايي:
" د علم زده کړه، په هر نارینه او هره ښځه فرض ده."
۲۰۰۶م کال
<< Home