انجام؟؟؟

ډېر خونخوار لېوان لږ وروسته
ترې لږ مخکې پړانګان دي
اوتر هغوى مخکې وینې څښونکي زمریان
د زمريانو په منځ کې
د يوه ځنګلي
د يوه وحشي
او مست خره نيم ژواندې جوسه پرته ده
خر د دومره لېوانو، پړانګانو او بالاخره د وینو څښونکو زمريانو په منځ کې بې وسه پروت دى
د خره مسكين زور اوبه شوى دى
په ورمېږ یې د ځنګل د پاچا خوله خښه ده،
او دى نن د ځنګله د قانون قرباني شوى دى
خره ته په يوه لحظه كې
په شنو ورشوګانو كې
د مستيو
د خېزكو او خرتيزكو ويشتلو
ټوله زنده ګي مخې ته شوه
په داسې حال كې
چې په سترګو یې تياره راتله
ویې ويل:
"زما له دې پرته انجام څه کېدای شي
چې اهلي شم
نو د ظالم انسان له لاسه
د درنو بارونو لاندې
يواځې پوست او هډ پاته شم
او چې وحشي شم
غټېږم، چاغېږم او پړسېږم
او بيا ...."
او خره وروستى سلګۍ ووهلې مړ شو.