نظم: هرې خواته ستا د مینې نظاره ده

امتراج د ښایستونو دی څو رنګه
درته وایمه چې کیناستې له څنګه

ستا په زلفو کې همدومره لوی تاثیر دی
پکې ښکېل دی که پاچا دی که وزیر دی

ستا په سترګو کې د ټول جهان ښکلا ده
هرې خوا ته بس دا ستا د مخ رڼا ده

هرې خوا ته ستا د مینې نظاره ده
ډوبېدونکي ته دې غېږه کناره ده

چې زه لوېږم بېرته پاڅمه ستا لاس وي
را پېرزو د لوی خالق همدغه پاس وي

دا دنیا څومره وړه څومره تیاره شي
ستا وجود چې پکې خاورې او ایره شي

په میوند چې کله شاته ځي مېړونه
ته ملاله شې او وکړې غورځنګونه

ته چې مور شې سراسر احترامات شې
مالامال د محبت په کرامات شې

ستا بچي وي چې په توره کې خوشحال شي
یا د پوهې سمندر شي سید جمال شي